Tubimi i PD më 17 prill, Apeli liron nga qelia pesë protestues
TIRANË, 11 maj /ATSH/ Gjykata e Apelit në Tiranë ka ndryshuar masën e sigurisë për pesë protestuesit e arrestuar pas akteve të dhunës gjatë protestës, ku dyshohet se hodhën molotovë në drejtim të godinës së Këshillit të Ministrave.
Gjykata e Apelit u mblodh sot me kërkesë të palës mbrojtëse, e cila kërkoi lirimin nga qelia të pesë protestuesve që ndodheshin në masën e sigurisë “Arrest me burg”.
Pasi dëgjoi palët, gjyqtari Dritan Hasa vendosi ndryshimin e masës së sigurisë nga “Arrest me burg” në “Detyrim paraqitje në policinë gjyqësore” për Klement Çuçkën, Bujar Tushën, Henri Shapllon, Mirvet Tocillën dhe Semi Biçin.
Lidhur me protestën e 17 prillit, të organizuar nga PD, në total janë 11 protestues nën hetim. Pesë prej tyre u lanë në shkallën e parë në masën “Arrest me burg” dhe sot dolën nga qelia, ndërsa për gjashtë të tjerët, gjyqtari i shkallës së parë Enkel Peza vendosi masën e sigurisë “Detyrim paraqitje”.
Gjykata vendosi në shkallën e parë masën “Detyrim paraqitje në policinë gjyqësore” për Bardhyl Ndoun, Sokol Bajraktarin, Igball Domin, Gentjan Tugën, Ernest Kapon dhe Edison Shytin.
Organi akuzës akuzon protestuesit e ndaluar për “Goditje për shkak të detyrës”, “Prishja e qetësisë publike”, “Shkatërrim i pronës me zjarr”, “Kundërshtim i punonjësit të rendit” dhe “Prodhimi dhe mbajtja pa leje e mjeteve të rrezikshme”.
11 të hetuarit për tubimin e PD më 17 prill:
- Klement Çuçka
- Bujar Tusha
- Henri Shapllo
- Mirvet Tocilla
- Semi Biçin
- Bardhyl Ndou
- Sokol Bajraktari
- Igball Domi
- Gentjan Tuga
- Ernest Kapo
- Edison Shyti
/a.f/r.e/