Tuchel shpall listën e zgjeruar të Anglisë, debutojnë Garner dhe Steele

LONDËR, 20 mars /ATSH/ – Trajneri i Anglisë, Thomas Tuchel, ka shpallur një listë të zgjeruar me 35 lojtarë për dy ndeshjet miqësore të muajit mars, duke testuar alternativa të reja në prag të përzgjedhjes përfundimtare për Kupën e Botës 2026.

Mes emrave të rinj spikasin mesfushori i Evertonit, James Garner, dhe portieri i Brightonit, Jason Steele, të cilët marrin ftesën e parë në ekipin kombëtar.

Lista shënon rikthimin e mbrojtësit Harry Maguire dhe talentit të ri Kobbie Mainoo nga Manchester United, si dhe të Fikayo Tomori, i cili rikthehet pas mungesës që prej tetorit 2023. Gjithashtu, në skuadër rikthehet sulmuesi Dominic Calvert-Lewin pas më shumë se pesë vitesh, ndërsa Dominic Solanke merr një tjetër mundësi pas mungesës që prej tetorit 2024.

Nga ana tjetër, bie në sy mungesa e mbrojtësit të Real Madridit, Trent Alexander-Arnold, si dhe e Ollie Watkins dhe Alex Scott. Reece James dhe Trevoh Chalobah mungojnë për shkak dëmtimi.

Në listë përfshihet edhe mesfushori Jude Bellingham, pavarësisht se nuk ka luajtur që prej fillimit të shkurtit për shkak dëmtimi, si dhe mbrojtësi John Stones, i cili ka pasur pak minuta në muajt e fundit.

Tuchel theksoi se lista e zgjeruar synon të krijojë konkurrencë dhe të testojë lojtarë të rinj përpara përzgjedhjes finale për Botërorin në SHBA.

Anglia do të luajë dy ndeshje miqësore në Wembley Stadium, përballë Uruguait më 27 mars dhe Japonisë më 31 mars, në kuadër të përgatitjeve për Kupën e Botës 2026.