Tusk përballet me votëbesim në parlament, tensione brenda koalicionit qeverisës

Kryeministri polak Donald Tusk do të përballet më 11 qershor me një votëbesim në parlament, në një përpjekje për të rifituar kontrollin politik pas humbjes befasuese të kandidatit të tij në zgjedhjet presidenciale.

Rafał Trzaskowski, kryebashkiaku i Varshavës dhe zëvendësi i Tusk në partinë Platforma Qytetare, humbi ndaj kandidatit të djathtë populist Karol Nawrocki, i mbështetur nga opozita Ligj dhe Drejtësi (PiS). Kjo disfatë ka tronditur kampin qeverisës dhe ka rritur pasiguritë për të ardhmen e koalicionit.

Ishte vetë Tusk që kërkoi votëbesimin, duke synuar të forcojë pozitat e tij dhe të demonstrojë se qeveria e tij ruan ende një mandat të qartë për të qeverisur. Por, në vend që të unifikojë radhët, votimi ka thelluar përçarjet brenda koalicionit, me figura të njohura që kanë kritikuar publikisht njëri-tjetrin për dështime dhe mungesë vizioni.

Megjithëse koalicioni gëzon në letër një shumicë të rehatshme (242 nga 460 mandate), disa ligjvënës kanë shfaqur hapur pakënaqësi ndaj drejtimit të Tusk dhe kanë kërkuar ndryshime në strukturat drejtuese dhe prioritetet e qeverisë. Media lokale raporton gjithashtu për kontakte të disa deputetëve me zyrtarë të PiS, në përpjekje për të ndërtuar një shumicë alternative konservatore.

Votëbesimi i sotëm pritet të jetë një test kyç për lidershipin e Donald Tusk dhe për fatin e koalicionit qeverisës.

/rtsh.al/