Ulqini, mikpritës i panairit të librit

Në këtë panair parashikohet të ekspozohen dhe të ofrohen për shitje mbi 6 mijë tituj librash, nga të cilat mbi 500 janë tituj të rinj. Letërsi artistike, autorë shqiptarë e të huaj, histori, botime enciklopedike, guida turistike e harta të çdo lloji, letërsi për fëmijë, fjalorë e metoda për mësimin e shqipes dhe të gjuhëve të huaja, libra utilitarë për e profesione të ndryshme, albume e katalogë gjithfarësh etj, do të jenë librat e rinj që do të paraqiten para lexuesve ulqinakë dhe pushuesve të huaj.

Sikurse çdo vit, Panairi i librit në Ulqin edhe në këtë edicion të 10-të do të ketë të ftuar të veçantë, personalitete nga fusha e kulturës, akademikë, administrata shtetërore dhe politika. Këtë vit, të ftuar të veçantë dhe në qendër të vemëndjes së publikut bashkë me veprën e tyre, do të jetë shkrimtari Besnik Mustafaj nga Shqipëria dhe një shkrimtar i njohur nga Mali i Zi.

Mbrëmja e dytë dhe e tretë do t’i kushtohet ekskluzivisht autorëve që me kontributin e tyre kanë botuar veprimtari akademike, për të cilët do të flasin gjerësisht studiuesit Piro Misha, akademiku Josif Papagjoni dhe botuesja Irena Toçi. Panairi i sivjetëm është i pari që çel veprimtaritë me librin në stinën verore për t’i hapur rrugë më pas gjatë muajit gusht disa panaireve të tillë në Vlorë dhe Sarandë.