V E N D I M PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, TË CILAT PREKEN NGA PËRMIRËSIMI I UNAZËS SË RE, NË BASHKINË E TIRANËS

V E N D I M 

PËR 

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, TË CILAT PREKEN NGA PËRMIRËSIMI I UNAZËS  SË RE, NË BASHKINË E TIRANËS

Në mbështetje të nenit 100 të Kushtetutës, të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, me propozimin e ministrit të Brendshëm, Këshilli i Ministrave

V E N D O S I :

1.     Shpronësimin, për interes publik, të pronarëve të pasurive të paluajtshme, pronë private, që preken nga përmirësimi i Unazës së Re, në bashkinë e Tiranës.

2.     Shpronësimi të bëhet në favor të bashkisë së Tiranës dhe, brenda      30 ditëve nga hyrja në fuqi e këtij vendimi, të bëhet regjistrimi i pasurisë 3 233 m² tokë arë, në favor të kësaj bashkie.

3.     Pronarët e pasurive të paluajtshme, që shpronësohen, të kompensohen në vlerë të plotë, sipas masës, që paraqitet në tabelën, që i bashkëlidhet këtij vendimi, për sipërfaqen 3 233 m², të vlerësuar në shumën e përgjithshme 39 879 055 (tridhjetë e nëntë milionë e tetëqind e shtatëdhjetë e nëntë mijë e pesëdhjetë e pesë) lekë.

4.     Vlera e përgjithshme e shpronësimit, 39 879 055 (tridhjetë e nëntë milionë e tetëqind e shtatëdhjetë e nëntë mijë e pesëdhjetë e pesë) lekë, të përballohet nga të ardhurat e bashkisë së Tiranës.

5.     Vlera e shpenzimeve proceduriale në shumën 150 000 (njëqind e pesëdhjetë mijë) lekë të përballohet nga bashkia Tiranë.

6.     Pasuria me nr.306/147, Vol:13, Fq.110, e ndodhur në zonën kadastrale 3866, të likuidohet pas zgjidhjes së konfliktit të pronësisë dhe pas konfirmimit nga ZRPP-ja.

7.     Afati i përfundimit të shpronësimit është data 5.3.2008.

8.     Afati i përfundimit të punimeve në objektin “Përmirësimi i Unazës së Re”, të jetë në përputhje me afatet e parashikuara nga bashkia e Tiranës.

9.     Ngarkohet Ministria e Brendshme për ndjekjen e zbatimit të këtij vendimi.

10.   Ngarkohet bashkia e Tiranës për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

SALI  BERISHA