“Vajza 15-vjeçare i ndryshoi jetën”/ Shqiptari shpenzon 60 mijë euro për t’u dhuruar shqiptarëve libra falas!

Një kërkesë e thjeshtë nga vajza e tij 15-vjeçare u kthye në një mision kombëtar. Rexhep Aliu, sipërmarrësi shqiptar nga Tetova, vendosi të sfidojë mungesën e librave audio në shqip dhe të krijojë një platformë që sot po prek zemrat e mijëra shqiptarëve kudo në botë.

Gjithçka nisi kur vajza e tij, e rritur në Gjermani, pyeti me habi: “Pse në gjermanisht ka libra audio, ndërsa në shqip jo?” Një pyetje që nuk e la të qetë Rexhepin.
Pa qenë programues dhe vetëm nga pasioni, ai investoi mbi 60 mijë euro nga xhepi i tij, duke ndërtuar platformën digjitale “iLIBRI”, një bibliotekë audio falas që u mundëson shqiptarëve të dëgjojnë libra shqip kudo dhe në çdo kohë.

Nga historia e kombit, kultura e deri tek letërsia shqipe, përdoruesit mund të dëgjojnë libra, t’i shkarkojnë offline dhe të vazhdojnë dëgjimin aty ku e kanë lënë. Një projekt që Rexhepi e quan mision shpirtëror më shumë sesa biznes.
Libri i parë në këtë bibliotekë audio ishte “Skënderbeu”, i realizuar pas konsultimeve me regjisorin Fatmir Koçi dhe i lexuar nga aktori Xhino Musollari, ndërsa regjistrimi u bë në studion e reperit të njohur MC Kresha.

Por sfida nuk mbaron këtu.
Pas përfshirjes së Kuranit në version audio, Rexhep Aliu zbulon se shumë shpejt do të vijë edhe Bibla audio, sepse – siç thotë vetë – nuk dëshiron të bëjë ndasi feje, por të sjellë për çdo shqiptar mundësinë për të dëgjuar fjalën e Zotit në gjuhën amtare. Një tjetër ëndërr e madhe është edhe “Lahuta e Malcisë”, që për herë të parë do të vijë si libër audio në gegnisht. Sfida? Gjetja e aktorit të duhur nga veriu që ta lexojë ashtu siç e meriton kjo vepër monumentale.

Në këtë rrugëtim nuk i kanë munguar mbështetësit: nga aktori Blerim Destani, tek MC Kresha dhe artistë të tjerë shqiptarë që i kanë hapur dyert pa kërkuar asgjë në këmbim. Sot aplikacioni është i disponueshëm për iPhone dhe shumë shpejt pritet të vijë edhe për Android. Por Rexhep Aliu ka edhe një thirrje publike: Akademitë e Shkencave të Shqipërisë dhe Kosovës t’i tregojnë librat më të fortë për historinë shqiptare, sepse ai është gati t’i kthejë në audio dhe t’ua dhurojë shqiptarëve falas.