Valutat fitojnë terren në raport me lekun

TIRANË, 20 korrik /ATSH/ Monedhat e huaja kanë fituar terren ndaj lekut në tregun vendas të këmbimit valutor këtë të hënë, pas një periudhe më shumë se dyjavore gjatë së cilës ato shënuan një zhvlerësim gradual.

Sipas kursit zyrtar të Bankës së Shqipërisë, euroja këmbehet sot me 93,67 lekë, duke u rritur me 0,09 lekë krahasuar me një ditë më parë.

Edhe dollari amerikan ka shënuar rritje në raport me monedhën vendase. Ai këmbehet me 81,97 lekë, ose 0,15 lekë më shumë se fundjava.

Ndërkohë, paundi britanik dhe franga zvicerane kanë regjistruar gjithashtu rritje. Paundi këmbehet me 110,34 lekë, duke fituar 0,39 lekë, ndërsa franga zvicerane kuotohet në 101,46 lekë, me një rritje prej 0,10 lekësh.

Tregu valutor vendas vijon të reflektojë lëvizjet e kërkesës dhe ofertës për valutë, pas një periudhe të gjatë ku monedha vendase ishte forcuar gradualisht ndaj monedhave kryesore ndërkombëtare.

Që nga fillimi i vitit, euro është zhvlerësuar me më shumë se 3%, ndërsa me bazë vjetore rënia ka arritur në më shumë se 4%.

Banka e Shqipërisë vlerëson se arsyeja kryesore e rënies së euros është përmirësimi i bilancit të pagesave, falë flukseve hyrëse të lidhura kryesisht me turizmin dhe investimet në pasuri të paluajtshme.

/e.xh/j.p/