Vendet e rajonit dënojnë sulmin iranian ndaj bazës ajrore amerikane në Katar

Vende të shumta në Lindjen e Mesme dhe Afrikën e Veriut kanë dënuar sulmin iranian në një bazë amerikane në Katar.

Egjipti e quajti sulmin “një shkelje të sovranitetit të Katarit, një kërcënim për integritetin e tij territorial dhe një shkelje të ligjit ndërkombëtar dhe Kartës së Kombeve të Bashkuara..

“Shprehim shqetësimin tonë të thellë për përshkallëzimin e shpejtë dhe të rrezikshëm në rajon, pohojmë refuzimin e plotë të të gjitha formave të përshkallëzimit ushtarak ose shkeljes së sovranitetit të shteteve dhe bëjmë thirrje për domosdoshmërinë e de-përshkallëzimit dhe një armëpushimi për të ruajtur paqen dhe sigurinë rajonale”, thuhej në deklaratë.

Arabia Saudite tha se sulmi ishte një shkelje e “parimeve të fqinjësisë së mirë dhe një akt krejtësisht i papranueshëm që nuk mund të justifikohet në asnjë rrethanë”.

Jordania dënoi atë që e quajti “agresion i nisur nga Irani kundër shtetit simotër të Katarit”.

Bahreini theksoi mbështetjen dhe solidaritetin e tij të plotë me Katarin, “duke reflektuar lidhjet e ngushta të vëllazërisë dhe farefisnisë midis tyre”.

Zyra e Presidentit të Autoritetit Palestinez e quajti gjithashtu sulmin një “shkelje flagrante të sovranitetit të shtetit simotër të Katarit”.

Irani lëshoi raketa të shumta drejt bazave amerikane në Katar të hënën pasi SHBA goditi vendet bërthamore të Iranit gjatë fundjavës. Mbrojtja ajrore e Katarit ndaloi sulmin me raketa dhe nuk ka pasur raporte për lëndime. Megjithatë, Katari dënoi sulmin e Iranit në bazën ajrore Al Udeid, duke e quajtur atë “një shkelje flagrante të sovranitetit dhe hapësirës ajrore të Katarit”.

/rtsh.al/