Vizita e Herzog në Tiranë, Policia “blindoi“ zonën rreth Kryeministrisë, Presidencës dhe Kuvendit

Vizita disaorëshe e presidentit të Izraelit në Tiranën zyrtare, ka bërë që Policia e Shtetit dhe institucionet e tjera të inteligjencës në vend të “blindonin“ perimetrin e godinës së kryeministrisë, presidencës dhe kryesisë së Kuvendit.

Hartimi i planit të masave u realizua në bashkëpunim edhe me autoritetet ligjzbatuese të Izraelit, të cilët prej disa javësh kanë ardhur në Shqipëri dhe kanë punuar me kolegët e tyre shqiptar.

Prezenca e shtuar e efektivëve u konstatua që në orët e para të mëngjesit, kur ata u panë gjatë gjithë perimetrit duke qëndruar në pozicione monitoruese, duke parë gjithçka çfarë ndodhte apo çdo person që qarkullonte në zonën e përcaktuar.

Të dhënat e Policisë së Shtetit saktësojnë, se në këtë plan masash janë angazhuar rreth 200 efektivë blu ndërsa ka të dhëna se edhe sipërfaqja mbi tarracat e objekteve është monitoruar.

Gazetare: Flutura Tota

/rtsh.al/