Vorë–Hani i Hotit, prezantohet projekti në Lezhë. Investimi do të shtrihet mbi gjurmën e hekurudhës ekzistuese

Projekti për rikonstruksionin e linjës hekurudhore Vorë-Hani i Hotit u prezantua në Lezhë përmes një dëgjese publike me komunitetet e zonave ku do të kalojë kjo vepër infrastrukturore. Investimi parashikon rehabilitimin e gjurmës ekzistuese të hekurudhës dhe përshtatjen e saj me standardet evropiane të transportit.

Projekti ka hyrë në fazën e përzgjedhjes së kontraktorit, ndërsa punimet pritet të përfundojnë deri në vitin 2030.

Linja hekurudhore Vorë-Hani i Hotit do të shtrihet në rreth 120 kilometra dhe do të jetë tërësisht e elektrifikuar. Trenat do të lëvizin me shpejtësi deri në 120 km/orë, duke transportuar udhëtarë dhe mallra.

Projekti përfshin rikonstruksionin e 12 stacioneve, 12 urave dhe ndërtimin e një tuneli, me kohë udhëtimi rreth 2 orë. Investimi prej rreth 356 milionë eurosh synon modernizimin e transportit hekurudhor dhe lidhjen e Shqipërisë me rrjetet rajonale e evropiane.

/rtsh.al/