Zelensky largohet, Netanyahu mbërrin në Shtëpinë e Bardhë, takim vendimtar me Trump mes krizës së marrëdhënieve
Kryeministri izraelit Benjamin Netanyahu mbërriti të martën pasdite (28 korrik) në Shtëpinë e Bardhë për një takim të rëndësishëm me Presidentin amerikan Donald Trump, në një kohë kur marrëdhëniet mes dy vendeve duket se janë në krizë për shkak të luftës me Iranin.
Ashtu si Presidenti ukrainas Volodymyr Zelensky, edhe Netanyahu hyri në Shtëpinë e Bardhë përmes hyrjes anësore, një detaj që ka ngjallur vëmendje.
Sipas një zyrtari të Shtëpisë së Bardhë, dy udhëheqësit pritet të diskutojnë mbi luftën me Iranin, marrëveshjen kornizë për paqen në Liban si dhe përpjekjet për zgjerimin e Marrëveshjeve të Abrahamit. Takimi vjen në një moment kur mbështetja brenda Izraelit për operacionet e Netanyahut kundër Iranit është zbehur, ndërsa edhe operacionet ushtarake në Rripin e Gazës kanë humbur mbështetjen e gjerë.
Netanyahu, i cili udhëheq qeverinë më të djathtë në historinë e Izraelit, përballet gjithashtu me zgjedhje në tetor.
Ky është takimi i parë ballë për ballë mes tyre që nga fillimi i luftës në fund të shkurtit. Marrëdhëniet e Netanyahut me Trumpin, të cilin ai e ka cilësuar shpesh si “mikun më të madh që Izraeli ka pasur ndonjëherë në Shtëpinë e Bardhë”, duket se janë përkeqësuar.
Muajin e kaluar, Axios raportoi se Trump e kishte quajtur Netanyahun “të çmendur” gjatë një telefonate të tensionuar, gjë që Trump e konfirmoi më pas në një intervistë për New York Post.
Presidenti amerikan ka shprehur pakënaqësi për kritikat e Netanyahut lidhur me vendimin për t’i shitur Turqisë avionë luftarakë F-35. “Askush nuk po më thotë se çfarë duhet dhe çfarë nuk duhet të shesim”, tha Trump nga bordi i Air Force One. Megjithatë, ai shtoi se qëndrimet e tij dhe të Netanyahut ndaj Iranit janë “mjaft të afërta”, pavarësisht disa dallimeve.
Nga ana e tij, Netanyahu deklaroi në një mbledhje të kabinetit izraelit se do të diskutojë me Trump gjendjen e luftës me Iranin, e cila nuk tregon shenja zgjidhjeje. “Ne ndonjëherë kemi mosmarrëveshje të rregullta, por gjithmonë gjejmë një mënyrë për t’i zgjidhur si miq të ngushtë”, tha ai.
Takimi zhvillohet në një atmosferë të tensionuar, teksa ligjvënësit amerikanë po shqyrtojnë mënyrën se si administrata ka menaxhuar luftën që nga nisja e saj në fund të shkurtit.
Katër ushtarë amerikanë janë vrarë ditët e fundit, duke e çuar numrin total të viktimave amerikane në këtë konflikt në 18.
/rtsh.al/