Zeneli, besnik Helsinkit
Erfan Zeneli ka vendosur t’i mbetet besnik Helsinkit. Mesfushori kosovar e ka vazhduar për dy vjet kontratën me kampionin e ri finlandez. Futbollisti vushtrrias ndihet mirë që do të mbetet pjesë e ekipit nga kryeqyteti finlandez, me të cilin synon t’i vazhdojë sukseset.
“Sapo nënshkrova për dy vjet me Helsinkin. Po ndihem mjaft mirë. Do të jem pjesë e këtij ekipi deri në fund të vitit 2013. Ma ofruan një kontratë mjaft të mirë, më të majme se atë që e kisha deri tash, kështu që vendosa të mbetem këtu. Pasi që nuk kishte ndonjë ofertë serioze nga klubet evropiane, e pash të udhës që është më mirë të mbetem këtu”, deklaroi Zeneli për Express.
Helsinki lufton gjithmonë për të fituar tituj, kështu që këtë karakter e ka edhe Zeneli. Gjithashtu, pjesëmarrja në garat evropiane ishte një tjetër arsye që e shtyri atë të qëndrojë në Finlandë.
“Helsinki gjithmonë lufton për vendin e parë, për të fituar trofe. Ky fakt më pëlqen shumë. Gjithashtu, pjesëmarrja e rregullt në Champions League e bëri të veten. Sezonin e ardhshëm synojmë të shkojmë edhe më larg në këtë kompeticion. Shpresoj të kemi short më të mirë”, vazhdoi Zeneli.
Futbollisti kosovar pëlqehej nga disa skuadra nga Gjermania, Italia, Zvicra e Austria, por nuk pati diçka konkrete, kështu që qëndroi në Helsinki. Mirëpo, edhe pse ka nënshkruar kontratë, ai tregon se mund të largohet nga Finlanda, nëse arrin ndonjë ofertë e mirë dhe nëse klubet merren vesh.
Ish reprezentuesi U-21 i Finlandës ka shkëlqyer këtë sezon me skuadrën e Helsinkit. Ai ka realizuar 8 gola në elitën e futbollit finlandez dhe 4 për Kupë, derisa ka dhuruar 13 asistime për bashkëlojtarët e vet. Së fundmi, Erfani është ftuar në një kamp që organizohet nga përfaqësuesja e Finlandës, ku përfshihen futbollistët finlandezë që luajnë në shtetet skandinave.