Spartak, më i madh se Chelsea

Pronari i Spartak Moskës, Leonid Fedun ka thënë se pas katër vitesh, klubi i tij do të jetë më i madh se Chelsea, pronë e bashkëkombësit të tij rus, miliarderit Roman Abramovich. “Plani im është që deri në fund të vitit 2015, Spartak të vetëfinancohet”, tha Fedun për Reuters.

“Cili është dallimi mes Spartakut dhe Chelsea? Spartak është legjendë e sportit rus dhe atij Sovjetik, ndërsa Chelsea, nëse nuk gaboj, nuk është as afër arritjeve tona”, shtoi ai. Spartak është klubi më i suksesshëm dhe më i famshëm rus, ndërsa ka fituar nëntë tituj në ligë mes periudhës 1992-2001.

Chelsea ka fituar tre tituj në Premierligë, dy FA Cup, dy League Cup dhe ka arritur në finale të Ligës së Kampionëve më 2008, prej kur Abramovich e bleu klubin më 2003.

“Fakti se Abramovich ka shpenzuar shumë më tepër para në klubin e tij dhe sigurisht të hyrat që merrni nga Premierliga janë në një shkallë krejt tjetër”, u shpreh Fedun, i cili njësoj si Abramovich, ka krijuar pasuri në naftë. “Por, pas disa vitesh, të hyrat e Spartakut do të krahasohen me ato të Chelseas, e pastaj do të shohim se kush është klub më i madh”, përfundoi ai.