Zjarret dhe thatësira në Evropë riaktivizojnë municionet e pashpërthyera të dy Luftërave Botërore

Zjarret masive pyjore që kanë përfshirë disa rajone të Evropës këtë verë po përballen me një rrezik të pazakontë e vdekjeprurës: bombat, minat dhe predhat e artilerisë të mbetura nga Lufta e Parë dhe e Dytë Botërore, të cilat po shpërthejnë nga nxehtësia ekstreme.

Shpërthime sporadike janë raportuar në zonat e djegura në Francë, Belgjikë, Gjermani dhe Holandë. Në rajonin e High Fens në Belgjikë—një ish-fushëbetejë e përgjakshme e Luftës së Dytë Botërore—zjarrfikësit dhe skuadrat e çminimit janë detyruar të përshtatin ndërhyrjet për shkak të shpërthimeve të predhave të varrosura në tokë.

Studiuesit e krizave klimatike theksojnë se ndryshimet e motit po ndikojnë drejtpërdrejt në nxjerrjen në sipërfaqe të këtyre armëve të fjetura. Sarah Njeri, studiuese e paqes dhe konfliktit në Universitetin e Londrës (SOAS), sqaron këtë fenomen:

“Ndryshimi i klimës tani po bën punën e zhvarrosjes dhe riaktivizimit të asaj që më parë ishte e qëndrueshme. Zjarret mund të ndezin municione të vjetra, por gjithashtu mund të djegin shkurret që i fshehin ato.”

Sfidat nuk kufizohen vetëm te flakët. Tkurrja e lumenjve si Danubi dhe Rajni nga thatësira ka ekspozuar bomba ajrore, mina detare dhe pajisje ushtarake në Sllovaki, Hungari dhe Gjermani, duke detyruar mbylljen e urave kryesore për çaktivizim të sigurt.

Përgjatë rajoneve si Ypres në Belgjikë, shërbimet e çminimit asgjësojnë çdo vit nga 200 deri në 250 tonë municione të nxjerra nga punimi i tokave—një dukuri e njohur nga fermerët lokalë si “korrja e hekurit”. Aktualisht, kushtet e rënduara atmosferike po detyrojnë shërbimet e emergjencës të përballen me dy rreziqe simultane: flakët dhe trashëgiminë e pahequr të luftërave.

/rtsh.al/