Zjarri në Shkozet, bllokohet qarkullimi në unazën e Durrësit dhe aksi drejt Kavajës

TIRANË, 30 korrik/ATSH/ Zjarri në një magazinë në Shkozet ka sjellë trafik të rënduar dhe bllokim të disa segmenteve në Durrës.

Policia njoftoi pasditen e sotme se për shkak të zjarrit të rënë në zonën e Shkozetit, është bllokuar qarkullimi i automjeteve në unazën e qytetit, në mbikalimin e Shkozetit, në segmentin rrugor “Martin Camaj”, në drejtim të Plepave, si dhe në segmentin rrugor Kavajë-Durrës.

Policia e Shtetit u bën thirrje të gjithë qytetarëve dhe drejtuesve të mjeteve të shmangin lëvizjen në këto akse rrugore dhe të përdorin rrugë alternative, deri në normalizimin e situatës.

Në njoftim thuhet se shërbimet e Policisë, në bashkëpunim me shërbimet zjarrfikëse dhe strukturat e tjera përgjegjëse, ndodhen në terren dhe po punojnë për menaxhimin e situatës, shuarjen e zjarrit, garantimin e sigurisë dhe rikthimin e qarkullimit sa më shpejt të jetë e mundur.

/r.e/