OSHEE: U stakua rrjeti 110 kV nga zjarri në Shkozet, po punohet për normalizimin e furnizimit me energji
TIRANË, 30 korrik/ATSH/ Zjarri në një magazinë në Shkozet ka bërë që Operatori i Shpërndarjes së Energjisë Elektrike (OSHEE) të stakojë linjën e furnizimit me energji elektrike 110 kV e si rrjedhojë raportohet për kufizime në furnizim në Durrës dhe zonat përreth.
OSHEE njoftoi se për shkak të një avarie në 2 linjat paralele të OST Rrashbull – Shkozet, sot rreth orës 15:40, disa nënstacione pranë këtyre zonave, përfshi edhe atë të qytetit të Durrësit, mbetën pa energji elektrike.
Sipas OSHEE, është raportuar për vatër zjarri pranë linjës 110 kV në Shkozet, që ka penguar funksionimin e plotë të rrjetit të OST, nga ku është konstatuar këputje e përcjellësit.
Zjarrëfikëset janë në terren dhe me kërkesë të tyre linja vijon të jetë e stakuar si rrjedhojë e masës së sigurisë.
Sipas njoftimit, nga ana e OST janë marrë masat e menjëhershme për furnizimin e disa zonave përmes linjave alternative (unazë). Në Durrës energjia është rikthyer pjesërisht dhe po punohet për normalizimin e situatës.
/r.e/