Zyrtare, shënohet rasti i parë i gripit të derrave në Shqipëri

Tiranë, 20 Korrik NOA Update Shënohet rasti i parë i prekjes nga virusi vdekjeprurës H1N1 në Shqipëri, konfirmoi për agjencinë e lajmeve NOA, një burim zyrtar në Ministrinë e Shëndetësisë.

Ne morëm mbrëmjen e së Hënës, analizat e mbërritura nga Rumania dhe Britania e Madhe për një studentë 21 vjeçar nga qyteti i Gjirokastrës, i cili u dyshua para 14 ditësh kur iu nënshtrua një vizite mjekësore në Qendrën Spitalore Universitare Nënë Tereza në Tiranë, thanë burimet zyrtare nga dikasteri i Shëndetësisë.

Aktualisht, studenti besohet se gjendet në Greqi ku ka shkuar për arsye personale.

Mësohet se djali gjirokastrit i cili studionte në Universitetin e Tiranës, kishte shfaqur më 5 korrik, simptoma të gripit, sikunder pohoi per agjencinë e lajmeve NOA, Alban Ylli, drejtor i Institutit të Shëndetit Publik.

Fillimisht nga vizita e kryer, u dyshuar për virusin A. Megjithatë, për shkak të specifikave të konstatuara, u vendos që të bëheshin analiza në Bukuresht të Rumanisë dhe më tej në Londër.

Përgjigjja ka ardhur pikërisht mbrëmjen e së Hënës nga Londra dhe iu komunikua Ministrisë së Shëndetësisë, duke e informuar se djali nga Gjirokastra është prekur nga virusi i rrezikshëm i gripit të derrave, AH1N1.

Më herët, ministrja e Shëndetësisë Anila Godo, deklaroi se të paktën 80 raste të dyshuara kishin shkuar për analizë por deri tani nuk kemi pasur asnjë të diagnostikuar.

Por Godo theksoi se gripi i derrave ose ka mbërritur ose pritet të vijë.

/k.b/NOA/