1 në 42 banorë pa dokumente, ‘shpërthen’ debati në Spanjë

Një në 42 banorë në Spanjë mendohet se ndodhet në vend pa dokumente, sipas aplikimeve për një amnisti të diskutueshme për emigrantët e paligjshëm të propozuar nga kryeministri Pedro Sánchez.

Rreth 1.2 milion emigrantë pa dokumente kanë aplikuar për të marrë status ligjor në kuadër të këtij programi, ka njoftuar qeveria e majtë të enjten, 2 korrik. Ky numër është shumë më i lartë se parashikimi fillestar, i cili ishte deri në 500 mijë aplikime.

Ky program është bërë një simbol i politikës së Sánchez për emigracionin e hapur, në një kohë kur shumë vende të tjera europiane dhe SHBA-të po forcojnë kontrollet kufitare.

Amnistia, të cilën Sánchez e ka quajtur “një akt drejtësie dhe domosdoshmëri”, u jep emigrantëve pa dokumente një leje qëndrimi 1-vjeçare, të rinovueshme, nëse kanë jetuar në Spanjë për të paktën 5 muaj dhe nuk kanë precedentë penalë.

Qeveria thekson se shumë prej aplikuesve tashmë punojnë në ekonominë informale dhe se programi i lejon ata të legalizojnë statusin e tyre. Deri më 30 qershor, rreth 159 097 prej tyre janë regjistruar në sistemin e sigurimeve shoqërore në Spanjë.

Sipas të dhënave, grupi më i madh i aplikuesve janë kolumbianët (25.9%), të ndjekur nga marokenët (13.3%), venezuelasit (11.8%) dhe peruanët (8.8%).  / abcnews.al /