40-vjeçari plagoset me armë, autor shoku i tij, prej tre muajsh nuk flisnin! 36-vjeçari në kërkim

Marilen Jata 40 vjeç, u paraqit mbrëmjen e djeshme rreth orës 22:20 në spital i plagosur me armë zjarri.

Policia e Tiranës ka identifikuar autorin e plagosjes së 40-vjeçarit, ngjarje e ndodhur në zonën e Institutit.

Marilen Jata është qëlluar me armë zjarri në këmbë nga shoku i tij. Ata më përpara kanë qenë shokë, por prej tre muajsh nuk flisnin me njëri-tjetrin.

Mbrëmjen e së dielës i plagosuri sapo është futur në rrugicë, aty i ka dalë para autori dhe e ka qëlluar me pistoletë. Menjëherë pas kësaj, autori është arratisur.

“Falë veprimeve hetimore, u bë i mundur identifikimi i autorit të dyshuar të ngjarjes, shtetasit F. F., 36 vjeç, i cili, pas një konflikti për motive të dobëta, rreth orës 22:20 të mbrëmjes së djeshme, plagosi me armë zjarri në këmbë shtetasin M. J”, njofton policia.

Pritet që oficerët e policisë të marrin në pyetje të plagosurin në Spitalin e Traumës për motivet dhe përplasjet që kishte me autorin.

Jata ndodhet jashtë rrezikut për jetën./vizionplus.tv