Adoleshentja në Vlorë tentoi t’i jepte fund jetës me armën e gjyshit, gjendet pas 4 ditësh pistoleta

Pistoleta me të cilën tentoi të vetëvritej 17-vjeçarja në Vlorë, ngjarje e ndodhur katër ditë më parë, është gjetur këtë të enjte nga Policia e Vlorës.

Uniformat blu bëjnë me dije se arma e zjarrit u gjet në një vend grumbullimi materialesh të ndryshme shtëpiake, pranë banesës së gjyshërve të të miturës dhe ndodhej brenda një qeseje plastike.

Krimi ndodhi në shtëpinë e gjyshërve të adoleshentes, e për këtë arsye, gjyshi i 17-vjeçares është nën hetim në gjendje të lirë për armëmbajtje pa leje.

Po kështu, sipas policisë, arma ishte fshehur nga familjarët e vajzës pas ngjarjes së rëndë.

Ndërsa babai i 17-vjeçares është arrestuar dhe sot u la në “arrest në burg” nga Gjykata e Vlorës, për dhunë në familje. Kjo pasi dyshohet se vajza e ndërmorri aktin ekstrem pas dhunës nga babai dhe konflikteve të vazhdueshme me të.

Njoftimi i Policisë Vlorë:

Vlorë/Gjendet dhe sekuestrohet arma e zjarrit që dyshohet se u përdor nga 17-vjeçarja në tentativën për vetëvrasje.

Në vijim të hetimeve për ngjarjen e ndodhur më datë 14.07.2025, në lagjen “Kushtrimi”, ku një 17-vjeçare mbeti e plagosur rëndë pas tentativës për vetëvrasje me armë zjarri, u bë e mundur gjetja dhe sekuestrimi, në cilësinë e provës materiale, i armës së zjarrit pistoletë, e cila ishte hedhur në një vend grumbullimi materialesh të ndryshme shtëpiake, pranë banesës së gjyshërve të të miturës dhe ndodhej brenda një qeseje plastike.

Arma e sekuestruar do t’i dërgohet Institutit të Policisë Shkencore për ekzaminime të mëtejshme, me qëllim dokumentimin e plotë të ngjarjes.

Materialet shtesë iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.