Aksident në aksin Librazhd-Elbasan, zjarrfikësit nxjerrin nga makina gruan e bllokuar brenda

Një aksident rrugor është regjistruar mbrëmjen e sotme në aksin Elbasan–Librazhd, pranë fshatit Mirakë.

Sipas informacioneve paraprake, dy automjete janë përplasur në korsinë e Korridorit VIII, e cila ende nuk është hapur për qarkullimin e mjeteve.

Si pasojë e përplasjes, një grua ka mbetur e bllokuar brenda njërit prej automjeteve.

Për nxjerrjen e saj është dashur ndërhyrja e shërbimit zjarrfikës, i cili ka bërë të mundur shpëtimin e saj.

Në vendngjarje kanë mbërritur forcat e Policisë dhe ekipet e urgjencës, ndërsa vijojnë verifikimet për zbardhjen e plotë të rrethanave dhe shkaqeve të aksidentit.