Akuzohet nga ish-bashkëjetuesi për kanosje dhe djegien e orendive shtëpiake, ndalohet Drejtoresha e Ministrisë së Brendshme

Mësohet se, Policia e Tiranës ka ndaluar pak ditë më parë drejtoreshën e Ministrisë së Brendshme, Alma Bime, e dyshuar për kanosjen e një të huaji përmes mesazheve dhe djegien e orendive shtëpiake të ish-bashkëjetuesit të saj, Mareglen Tomori, në banesën që ndodhet në rrugën “Hysen Xhura” në Kinostudio.

Tomori ka një vilë 3 katëshe në këtë zonë dhe prej disa kohësh kishte punësuar një të huaj me leje qëndrimi në Shqipëri që jetonte në katin e parë të vilës dhe kujdesej për kopshtin. Bime ka debatuar me ish-bashkëjetuesit kohë më parë, dhe i ka djegur krevatin në vilë.

Më pas është konfliktuar edhe me të huajin, të cilin e ka akuzuar për bashkëpunim me ish-bashkëjetuesin e saj, duke e kërcënuar se do t’ hiqte lejen e qëndrimit.

Denoncimi është bërë nga Tomori, i cili ka marrë dëshmitarë edhe punëtorin e huaj për të provuar mesazhet kërcënuese ndaj tij.

Në shtator, policia kishte arrestuar vetë Tomorin, nën dyshimin se kishte ushtruar dhunë fizike ndaj drejtoreshës së Ministrisë së Brendshme.