Balla pret Krichbaum: Gjermania mbështet fuqimisht integrimin e Shqipërisë në BE

TIRANË, 23 janar /ATSH/ Kryetari i grupit parlamentar të Partisë Socialiste, Taulant Balla zhvilloi një takim zyrtar me Gunther Krichbaum, i cili ndodhet për vizitë zyrtare në Shqipëri në cilësinë e Ministrit të Shtetit për Europën në Qeverinë Federale të Gjermanisë.

Gjatë takimit, Balla shprehu mirënjohjen për vëmendjen dhe mbështetjen e vazhdueshme të Krichbaum ndaj Shqipërisë, si në Bundestagun gjerman, ashtu edhe në rolin e tij aktual qeveritar.

Ai theksoi se, Gjermania renditet e para për mbështetjen e drejtpërdrejtë të akorduar Shqipërisë.

Sipas Ballës, marrëdhëniet mes Shqipërisë dhe Gjermanisë ndodhen sot në nivelin më të lartë historik, si në aspektin dypalësh, ashtu edhe në kuadër të organizatave ndërkombëtare, ku të dyja vendet janë pjesë. “Gjermania vazhdon të mbështesë fuqimisht procesin e anëtarësimit të Shqipërisë në Bashkimin Europian”, tha Balla.

/gj.m/r.e/a.f/