Bashkia Durrës forcon bashkëpunimin me organizatat për menaxhimin e qenve endacakë
TIRANË, 4 mars /ATSH/ Kryetarja e bashkisë Durrës, Emiriana Sako, zhvilloi një takim me përfaqësues të organizatave për mbrojtjen e kafshëve, Jeta Tier Und Mensch dhe Kolibja e Zemrës, të cilat operojnë në qytetin e Durrësit dhe rrethinat e tij.
Gjatë takimit, u diskutuan mënyrat për të zgjeruar dhe forcuar bashkëpunimin në menaxhimin e qenve endacakë, duke vendosur në qendër sigurinë e qytetarëve dhe mirëqenien e kafshëve. Kryetarja Sako theksoi rëndësinë e koordinimit mes institucioneve lokale dhe organizatave joqeveritare për të siguruar një trajtim human dhe efektiv të kafshëve endacake, duke u fokusuar në parandalimin e incidenteve dhe përmirësimin e infrastrukturës për mbrojtjen e kafshëve.
“Synojmë të ndërmarrim masa të koordinuara që të garantojnë trajtimin e duhur të kafshëve endacake, duke respektuar standardet e mirëqenies dhe duke ruajtur sigurinë e qytetarëve. Bashkëpunimi me organizatat lokale është thelbësor për të arritur rezultate konkrete dhe të qëndrueshme”, u shpreh Sako.
Organizatat Jeta Tier Und Mensch dhe Kolibja e Zemrës prezantuan praktikat e tyre për trajtimin, sterilizimin dhe kujdesin për qentë endacakë, si dhe idetë për edukimin e komunitetit mbi trajtimin human të kafshëve. U diskutua gjithashtu për mundësinë e organizimit të fushatave ndërgjegjësuese dhe programeve të monitorimit në terren.
Bashkia Durrës planifikon të hartojë një plan veprimi afatmesëm, i cili përfshin masat për mbrojtjen e kafshëve, koordinimin e ekipeve të inspektimit dhe bashkëpunimin me institucionet shëndetësore dhe edukative, në mënyrë që qyteti të bëhet një model për menaxhimin e kafshëve endacake në nivel kombëtar.
Takimi përfundoi me vendimin për forcimin e dialogut dhe bashkëpunimit të vazhdueshëm mes Bashkisë dhe organizatave për mbrojtjen e kafshëve, me qëllim përmirësimin e shërbimeve dhe sigurisë për qytetarët dhe kafshët në Durrës.
1 nga 3e.xh/j.p/