Bavarezi rekordmen, Erblin Osmani/ Adoleshenti me origjinë nga Kosova, debuton në moshën 16 vjeç

Kishte shumë emocione, sepse ishte përfshirë në skuadër. Quhet Erblin Osmani, ishte marrë nga trajneri Vinsent Kompani, dhe ia doli ta realizonte ëndrrën e parë të jetës.

Adoleshenti me origjinë nga Kosova u aktivizua si zëvendësues në ndeshjen që Bajerni e arriti në Mynih ndaj Unionit të Berlinit, për Bundesligën gjermane.

Në moshën 16 vjeç, 10 muaj e dy ditë, ai u bë I dyti lojtar më I ri që bën debutimin për gjigandin bavarez.

Tekniku belg e aktivizoi në minutën e 87-të, ndërsa kampionët e Gjermanisë kryesonin 4-0 ndaj rivalit.

Osmani luan për ekipin U17 të Bajernit, dhe ka shënuar 3 gola e ka shërbyer një asist në 5 ndeshje në kampionatin e moshës, si dhe ka spikatur si një nga talentet e së ardhmes.

Lindur në Mynih, por me prindër të ardhur nga Gjilani i Kosovës, ai është aktivizuar me kombëtaret gjermane U16 e U17.

Pritet që të arrijë të ketë karrierë të rëndësishme në skuadrën më të madhe të Bundesligës, ndërsa e ardhmja besohet se do të jetë me kombëtaren e Gjermanisë, ndonëse ku i dihet mund të mendojë për Kosovën apo ndoshta për Shqipërinë./abcnews.al