Bënë shqipojnën, lirohen katër gjimnazistët shqiptarë që u ndaluan në Mal të Zi

Ambasada e Shqipërisë në Malin e Zi informoi sot se katër nxënësit shqiptarë të mitur, të ndaluar më 31 tetor në Kotorr, janë liruar pa dënim pas përfundimit të seancës gjyqësore dhe janë nisur drejt Shqipërisë.

Në një njoftim të publikuar në rrjetet sociale, bëhet me dije se sipas informacionit të marrë, ndalimi pasoi një konflikt verbal me një shtetase malazeze, pasi nxënësit kishin bërë me duar simbolin e shqiponjës dykrenare.

Sipas ambasadës, që prej marrjes dijeni për ngjarjen dhe deri në përfundimin e procedurave ligjore e nisjen e nxënësve drejt Shqipërisë, përfaqësuesi i ambasadës ka qëndruar pranë tyre, duke ofruar asistencë konsullore.

Ambasada ka mbajtur gjatë gjithë kohës komunikim të vazhdueshëm me autoritetet malazeze, familjarët dhe mësuesit.

Sipas autoriteteve malazeze, gjatë procedurave është garantuar respektimi i të drejtave të të miturve dhe është siguruar avokat, përkthyes dhe psikolog.

Ambasada e Shqipërisë në Mal të Zi vlerëson bashkëpunimin me autoritetet malazeze dhe mbetet e angazhuar për mbrojtjen e të drejtave dhe interesave të shtetasve shqiptarë. /Telegrafi/