Berisha mbledh aleatët, por Mediu, Duka e Blushi mungojnë: “Duhet ujdi për reformën zgjedhore e territoriale”

Kreu i PD, Sali Berisha po zhvillon një takim me aleatët për të gjetur ujdinë e përbashkët për reformën zgjedhore dhe territoriale.

TIRANË– Kreu i PD, Sali Berisha po zhvillon një takim me aleatët për të gjetur ujdinë e përbashkët për reformën zgjedhore dhe territoriale.

“Ky takim ka qëllim kryesor të gjejmë një ujdi së bashku si një front i gjerë për reformën zgjedhore dhe reformën territoriale. Në fakt, reforma themelore të një sistemi, duhet pranuar. Sot, Shqipëria është një njollë e zezë në hartën e Europës. Është zyrtarisht, pas raportit të fundit të OSBE/ODIHR, autokraci elektorale apo diktaturë autoritare. Do të thotë regjim që e pranon pluralizmin, por e shtyp pluralizmin. Ky është i gjithë thelbi i saj. Nuk është totalitare sepse e pranon pluralizmin”, tha Berisha.

Por, asnjë prej aleatëve kryesorë nuk i është bashkuar takimit. Fatmir Mediu ndodhet jashtë Shqipërie dhe ka dërguar në takim këshilltarin bashkiak, ndërsa Tedi Blushi ka dërguar deputeten Burnilda Hoxha, ndërsa mungon edhe Agron Duka.