“Brezi i artë – Violeta Manushi”- Shfaqet në Korçë dokumentari në 100-vjetorin e lindjes së ikonës së skenës shqiptare

Në 100-vjetorin e lindjes së aktores së madhe korçare Violeta Manushi, Teatri “Andon Z. Çajupi” shfaqi premierën e dokumentarit “Brezi i Artë – Violeta Manushi”. Përmes materialeve arkivore, dëshmive dhe rrëfimeve, filmi sjell portretin njerëzor dhe artistik të Manushit, duke e rikthyer atë në vëmendjen e brezave të rinj.

“Qëllimi ishte të heqim pluhurin e harresës, ti lëmë diçka në të ardhmen, dokumente, argumente, prova të këtyre artistëve të mëdhenj që krijuan themelin e teatrit shqiptar dhe të filmit si një vlerë e paçmuar e identitetit shqiptar”, u shpreh aktorja Merita Cocoli.

Gjatë punës për realizimin e dokumentarit, Çoçoli tregon se ajo që e ka prekur më shumë ishte disiplina dhe dashuria e pakushtëzuar e Manushit për profesionin.

“Mësova këmbënguljen e saj, ajo tha që dua të vdes në skenë. Ke shumë çfarë mëson prej saj, në pozicionin e aktores ka qenë e shkëlqyer”, tha ajo.

Publiku korçar përjetoi emocione të forta dhe kujtime të paharruara për Violeta Manushin, ikonën e skenës dhe filmit shqiptar, bijën e qytetit që u kthye në simbol të artit kombëtar.

Gazetare: E. Fili

/rtsh.al/