Denaj pret ministrin irlandez, në fokus zhvillimi i qëndrueshëm i sektorit të bujqësisë

TIRANË, 22 korrik/ATSH/ Ministrja e Bujqësisë dhe Zhvillimit Rural, Anila Denaj priti në një takim ministrin e Shtetit për Çështjet Evropiane dhe Mbrojtjen të Irlandës, Thomas Byrne. Në një postim në rrjetet sociale, Denaj tha se gjatë takimit me Byrne biseduan mbi zhvillimin e qëndrueshëm të sektorit të bujqësisë, si pjesë e rrugëtimit të Shqipërisë drejt anëtarësimit në Bashkimin Evropian. “Në prag të Presidencës irlandeze të Këshillit të BE-së në vitin 2026, vlerësuam mbështetjen e palëkundur të Irlandës dhe gatishmërinë për të thelluar bashkëpunimin dypalësh në sektorin bujqësor”, theksoi Denaj. Ministrja Denaj tha se “Irlanda ka ndërtuar një model të suksesshëm përmes bashkimit të fermerëve në struktura të fuqishme, të cilat furnizojnë një pjesë të rëndësishme të tregut evropian me produkte cilësore, një model që përputhet me vizionin tonë “Bujqësia 2030”’. 1 nga 5 /k.s/j.p/