Durrës/ Kapet në Tiranë 23-vjeçari i kërkuar për tentativë vrasjeje në lokal

Policia e Durrësit, në bashkëpunim me forcat e Kamzës, ka finalizuar operacionin e koduar “Akuza”, duke arrestuar në Tiranë një 23-vjeçar të shpallur në kërkim për tentativë vrasjeje me armë zjarri në një lokal në lagjen nr. 9 të Durrësit.

Sipas njoftimit zyrtar të Policisë së Shtetit, operacioni u zhvillua pas një bashkëpunimi mes specialistëve të Seksionit për Hetimin e Krimeve ndaj Personit në Drejtorinë Vendore të Policisë Durrës dhe shërbimeve të Komisariatit të Policisë Kamëz.

Si rezultat i veprimeve operacionale, u bë e mundur kapja në Tiranë e shtetasit F. B., 23 vjeç, i cili ishte shpallur në kërkim nga autoritetet.

Gjykata e Durrësit i kishte caktuar më herët masën e sigurisë “Arrest në burg”, në muajin mars 2026, për veprën penale “Vrasja me paramendim”, e mbetur në tentativë dhe e kryer në bashkëpunim.

Hetimet tregojnë se ngjarja për të cilën akuzohet ka ndodhur më 15 dhjetor 2025, në një lokal në lagjen nr. 9 të Durrësit, ku i riu dyshohet se ka tentuar të vrasë me armë zjarri shtetasin F. K., në bashkëpunim me tre persona të tjerë.

Pas arrestimit, materialet procedurale i janë referuar Prokurorisë së Durrësit për veprime të mëtejshme ligjore.