Egnatia përmbys Tiranën në transfertë, kampionët marshojnë drejt titullit

Egnatia ka marrë një fitore të rëndësishme në transfertë, duke mposhtur Tiranën me rezultatin 2-1 në ndeshjen e zhvilluar në Vorë, e vlefshme për javën e 10-të të Superiores. Kampionët në fuqi treguan karakter, duke përmbysur disavantazhin e hershëm dhe duke siguruar tri pikë të rëndësishme në garën për kreun e renditjes.

Bardheblutë e nisën ndeshjen në mënyrën më të mirë të mundshme. Drilon Hazrollaj kaloi Tiranën në avantazh që në minutën e 4-t, duke ndezur shpresat për një rezultat pozitiv për skuadrën kryeqytetase.

Megjithatë, reagimi i Egnatias nuk vonoi. Në minutën e 20-të, Karim Loukili riktheu baraspeshën, duke e çuar rezultatin në 1-1. Pjesa e parë u mbyll me këtë rezultat, pavarësisht përpjekjeve të të dyja skuadrave për të gjetur golin e avantazhit.

Në fraksionin e dytë, Egnatia arriti të bëjë diferencën. Ibrahim Diabaté shënoi golin e fitores, duke përfituar edhe nga ndërhyrja e portierit Bekaj, dhe vulosi triumfin 2-1 për rrogozhinasit.

Reklamë

Me këtë sukses, Egnatia regjistron fitoren e tetë në kampionat dhe shkon në kuotën e 24 pikëve pas 10 ndeshjesh, duke u shkëputur katër pikë nga Teuta, që ka një ndeshje më pak. Nga ana tjetër, Tirana mbetet në kuotën e 12 pikëve.

Kampionët në fuqi dërgojnë kështu një tjetër mesazh në garën për titullin, ndërsa Tirana largohet e zhgënjyer pas një ndeshjeje ku kaloi e para në avantazh, por nuk arriti ta ruante rezultatin.