FOKUS – SHBA-ja dhe Irani shkëmbejnë sulme të reja në rajonin e Gjirit
UASHINGTON/TEHERAN, 10 qershor /ATSH-DPA/ – Shtetet e Bashkuara të Amerikës dhe Irani kanë ndërmarrë sulme të reja ndaj njëri-tjetrit gjatë natës në rajonin e Gjirit. duke rritur më tej tensionet dhe duke vënë në pikëpyetje armëpushimin e brishtë dhe bisedimet për përfundimin e luftës.
Sipas Komandës Qendrore të SHBA-së (CENTCOM), ushtria amerikane goditi objektiva iraniane të mbrojtjes ajrore, stacione kontrolli tokësor dhe radarë vëzhgimi pranë Ngushticës së Hormuzit, si përgjigje ndaj rrëzimit të një helikopteri ushtarak amerikan “Apache” pranë brigjeve të Omanit.
Nga ana e saj, Irani sulmoi baza ushtarake amerikane në rajonin e Gjirit dhe në Jordani, përfshirë me raketa balistike, raportuan mediet iraniane. Forcat e armatosura të Kuvajtit njoftuan se sistemet e mbrojtjes ajrore u aktivizuan, ndërsa sirenat e alarmit u dëgjuan edhe në Bahrein.
Presidenti amerikan Donald Trump deklaroi më herët se Irani ishte përgjegjës për rrëzimin e helikopterit dhe paralajmëroi kundërpërgjigje. Më pas ai e cilësoi reagimin amerikan si “shumë të fortë dhe shumë të fuqishëm”.
Sipas raportimeve të mediave amerikane, sulmet kundër Iranit u zhvilluan në tre valë dhe goditën rreth 20 objektiva. Mediat iraniane raportuan shpërthime në qytetin Sirik, në ishullin Qeshm dhe në zonat përreth qytetit Bandar Abbas.
Agjencia iraniane “Tasnim” njoftoi se dy depo uji në Sirik u goditën, duke ndërprerë furnizimin lokal me ujë të pijshëm.
Teherani paralajmëron kundërpërgjigje
Ndërsa ushtria amerikane i përshkroi sulmet si veprime vetëmbrojtëse, autoritetet iraniane e quajtën këtë argument një “justifikim të dobët”. Ministri i Jashtëm iranian Abbas Araghchi paralajmëroi se çdo sulm do të marrë përgjigje.
“Forcat tona të fuqishme të armatosura nuk do të lënë pa përgjigje asnjë sulm apo kërcënim”, shkroi ai në rrjetin social X, duke shtuar se forcat e huaja duhet të largohen nga rajoni nëse duan siguri.
Pak më vonë, sipas mediave iraniane, Islamic Revolutionary Guard Corps (IRGC) kreu një sulm me dron ndaj selisë së Flotës së Pestë të Marinës amerikane në Bahrein. Raportet përmendën gjithashtu një sulm ndaj një baze amerikane në Jordani.
Alarm i ri në Bahrein
Sirenat e alarmit u dëgjuan sërish në orët e para të mëngjesit në Bahrein. Ky shtet ishullor, ashtu si Kuvajti dhe vende të tjera të Gjirit, ka qenë disa herë objektiv i sulmeve iraniane gjatë konfliktit, pasi strehon baza ushtarake amerikane që ndodhen vetëm disa qindra kilometra larg Iranit.
Megjithatë, pavarësisht përshkallëzimit të ri, presidenti Trump deklaroi në një intervistë telefonike për “ABC News” se ekziston ende një marrëveshje “shumë e mirë” për përfundimin e luftës dhe se ajo ka të ngjarë të mbetet në fuqi.
Konflikti, i cili nisi në fund të shkurtit, vazhdon të pengojë përpjekjet për rikthimin e lundrimit normal në Ngushticën e Hormuzit, një nga rrugët më të rëndësishme detare për transportin global të naftës dhe gazit. /Ad.Ab./