FRANCË – Vdes ish-kryeministri socialist Lionel Jospin
PARIS, 23 mars /ATSH-AFP/ – Ish-kryeministri socialist francez, Lionel Jospin vdiq në moshën 88-vjeçare.
Përveç arritjeve të tij si kreu i qeverisë nga fundi i viteve 1990, ai do të mbahet mend si një kandidat dy herë për president, i cili në vitin 2002 pësoi një poshtërim tronditës në raundin e parë nga Jean-Marie Le Pen i ekstremit të djathtë.
Përpara kësaj, Jospin kishte shërbyer pesë vjet si kryeministër nën presidentin konservator Jacques Chirac.
Ai mbeti deri në fund një figurë e njohur dhe unifikuese e së majtës, pavarësisht humbjes së tij historike në raundin e parë të zgjedhjeve presidenciale të vitit 2002 kundër Jean-Marie Le Pen.
Lionel Jospin reflektoi gjatë mbi arsyet e kësaj fiaskoje, që i dha fund papritur dhe para kohe karrierës së tij politike.
“Unë pranoj plotësisht përgjegjësinë për këtë humbje dhe nxjerr përfundimet e nevojshme duke u tërhequr nga jeta politike”, tha ai.
Kjo deklaratë, e bërë në mbrëmjen e 21 prillit 2002, e cila pa të djathtën ekstreme të arrinte raundin e dytë për herë të parë, do të mbetet përgjithmonë e skalitur në analet e politikës franceze.
Pesë vjet më parë, Lionel Jospin kishte hyrë në Matignon në krye të një shumice të larmishme të krahut të majtë, duke bashkuar socialistët, komunistët dhe ambientalistët, një fitues i papritur në zgjedhjet legjislative të shkaktuara nga shpërbërja po aq e papritur e Asamblesë Kombëtare nga Presidenti Jacques Chirac.
I nxitur nga një klimë ekonomike shumë e favorshme, ai bashkëjetoi me presidentin golist dhe zbatoi reduktimin e javës së punës në 35 orë, mbulimin shëndetësor universal (CMU) dhe një kontratë bashkimi civil – PACS – për të gjitha çiftet, një pararendës i largët i martesës së së njëjtës gjini.
I rrethuar nga një ekip i fortë ministror, ai ia doli të ulte papunësinë. D
he kur kandidoi në zgjedhjet e vitit 2002, ky ish-basketbollist i nivelit të lartë universitar, i gjatë, i ngurtë, me syze me skelet çeliku dhe flokë kaçurrela tani të zbardhur nga mosha, mbante shpresat e mëdha të një krahu të majtë që, pas François Mitterrand, ëndërronte një kthim në Pallatin Élysée.
Ashtu si shumica e elitës politike të vendit, Lionel Jospin, i lindur në një familje protestante në vitin 1937 në Meudon pranë Parisit, u bë i suksesshëm në shkollën prestigjioze ”École Normale d’Administration” (ENA), duke u bashkuar me Ministrinë e Punëve të Jashtme në vitin 1965./ a.jor.