Fermeri vendos rekordin personal, vargu i qepëve 110 metër, arrin gjatësinë e Urës së Mesit

Një fermer nga Postriba e Shkodrës ka arritur të realizojë një ide të kahershme, duke e kthyer atë në një simbol të punës dhe traditës vendase. Kujtim Plangaj, pas 5 vitesh përpjekjesh, ka përfunduar ndërtimin e një vargu qepësh me gjatësi 110 metra, një realizim që synon të promovojë produktin karakteristik të zonës.

“Kemi marrë pjesë afërsisht tre katër punëtorë në ditë afërsisht 25 punëtorë me u realizu ky varg. Ka përafërsisht 1.2 ton qepë, varet nga madhësia qepës”, u shpreh fermeri.

Plangaj shprehet se kjo nismë lidhet ngushtë me dashurinë për Postribën, bujqësinë dhe vlerat kulturore të zonës, duke veçuar si simbol edhe Urën e Mesit.

“Qepët janë autoktone e cila është 300 vjeçare dhe për Urën e Mesit që është mrekulli e zonës tonë”, tha ai.

Ura e Mesit është bashkuar simbolikisht me produktin karakteristik tre shekullor të zonës, qepën e Postribës, duke përcjellë një mesazh të fortë për ruajtjen dhe promovimin e trashëgimisë bujqësore dhe monumenteve kulturore. Kjo nismë synon të rrisë ndërgjegjësimin për mbështetjen e fermerëve dhe vlerësimin e pasurive historike e natyrore të zonës.

Gazetare: M. Gjoni

/rtsh.al/