Fluks i lartë në Morinë, qytetarët kthehen për të kaluar festat me familjarët

 Në pikën e kalimit kufitar në Morinë është shënuar rritje e ndjeshme e fluksit të udhëtarëve dhe automjeteve gjatë gjithë javës, ndërsa edhe këtë fundjavë janë regjistruar kalime të shumta.

Fluksi dominohet kryesisht nga qytetarë të Kosovës, të cilët kanë zgjedhur Shqipërinë për të kaluar fundjavën dhe pushimet.

Afrimi i festave ka ndikuar gjithashtu në shtimin e lëvizjeve në këtë pikë kufitare, për shkak të kthimit të emigrantëve që zgjedhin vendlindjen për të pushuar.

Pavarësisht fluksit në rritje, situata në pikëkalimin kufitar të Morinit po menaxhohet normalisht nga Policia Kufitare, me qëllim shmangien e radhëve të gjata dhe uljen e kohës së pritjes.

Për mjetet me targa të huaja nuk janë shënuar vonesa, ndërsa për shtetasit e Shqipërisë dhe Kosovës po zbatohet kalimi pa kontroll, në bazë të marrëveshjes dypalëshe mes dy qeverive.

Gazetare : Shkurte Elezaj
/rtsh.al/