GAZA – Tedros: Ushtria izraelite sulmoi depot e OBSH-së
GAZA, 22 korrik /ATSH-DPA/ – Ushtria izraelite sulmoi depot dhe objektet e tjera të Organizatës Botërore të Shëndetësisë (OBSH) gjatë avancimit të saj në Rripin e Gazës, deklaroi drejtori i përgjithshëm, Tedros Adhanom Ghebreyesus.
Tedros tha në një deklaratë se një rezidencë e stafit të OBSH-së në Deir al-Balah, në Rripin qendror të Gazës, “u sulmua tre herë sot si dhe depoja e saj kryesore”.
Ushtria izraelite hyri në objekt, duke detyruar gratë dhe fëmijët të evakuoheshin në këmbë në Al-Mawasi, mes konfliktit të vazhdueshëm”, thuhej në deklaratë.
Stafi meshkuj dhe anëtarët e familjeve të tyre u prangosën, u zhveshën, u morën në pyetje në vend dhe u qëlluan me armë zjarri.
Dy anëtarë të stafit të OBSH-së dhe dy anëtarë të familjes u arrestuan.
Tre u liruan më vonë, ndërsa një anëtar i stafit mbetet i ndaluar.
Organizata bën thirrje për lirimin e anëtarit të stafit.
Tedros tha se depoja kryesore e OBSH-së për Rripin e Gazës, e vendosur në Deir al-Balah, u dëmtua gjithashtu të dielën “kur një sulm shkaktoi shpërthime dhe një zjarr brenda”.
“Me depon kryesore jofunksionale dhe shumicën e furnizimeve mjekësore në Gaza të shteruara, OBSH-ja është shumë e kufizuar në mbështetjen e duhur të spitaleve, ekipeve mjekësore të urgjencës dhe partnerëve shëndetësorë”, tha ai./ /os/