GJENEVË – OKB: Sulmet e kolonëve izraelitë ndaj palestinezëve në rritje
GJENEVË, 9 qershor /ATSH-DPA/- Dhuna e ushtruar nga kolonët izraelitë ndaj civilëve palestinezë në Bregun Perëndimor vazhdon të përshkallëzohet, sipas një raporti të publikuar sot nga Komisioni i Pavarur Ndërkombëtar i Hetimit i OKB-së.
Raporti, i paraqitur në Këshillin e të Drejtave të Njeriut të OKB-së, tregon se gjatë vitit të kaluar kolonët izraelitë vranë të paktën shtatë palestinezë dhe plagosën 832 të tjerë. Sipas dokumentit, numri i viktimave është më shumë se dyfishuar krahasuar me vitin 2024.
Në korrik të vitit 2025, kolonë të shoqëruar nga ushtarë izraelitë sulmuan palestinezë që po punonin në arat e tyre. Një fermer u vra nga një plumb në kokë, ndërsa një tjetër humbi jetën pasi u rrah për vdekje.
“Ky trend vazhdon edhe në vitin 2026, me sulme që kryhen çdo ditë”, thuhet në raportin e OKB-së.
Sipas hetimit, autoritetet izraelite i kanë mundësuar këto sulme përmes mbështetjes financiare dhe ushtarake. Raporti akuzon gjithashtu institucionet gjyqësore dhe organet e zbatimit të ligjit në Izrael se kanë toleruar pandëshkueshmërinë e dhunës së kolonëve për dekada me radhë.
Kryetari i komisionit hetimor, Srinivasan Muralidhar, deklaroi se sulmet e përditshme ndaj palestinezëve janë të papranueshme dhe duhet të marrin fund. Ai kërkoi që Izraeli të ndalojë mbështetjen ndaj kësaj dhune dhe të sigurojë mbrojtjen e popullsisë civile palestineze.
Muralidhar u bëri thirrje gjithashtu vendeve të komunitetit ndërkombëtar të ushtrojnë presion të koordinuar ndaj Izraelit për të përmbushur detyrimet sipas ligjit ndërkombëtar, për të çmontuar vendbanimet dhe postblloqet e kolonëve dhe për t’i dhënë fund njëherë e përgjithmonë dhunës në Bregun Perëndimor.
Nga ana tjetër, Izraeli i ka hedhur poshtë vazhdimisht kritikat ndaj veprimeve të kolonëve, duke i cilësuar ato si të pabazuara.
Sipas raportit, dhuna e kolonëve radikalë ndaj palestinezëve dhe pronave të tyre është rritur ndjeshëm që nga sulmi i paprecedentë i Hamas në jug të Izraelit më 7 tetor 2023 dhe lufta që pasoi në Gaza. Disa media izraelite i janë referuar këtyre akteve edhe si “terrorizëm hebre”. /Ad.Ab./