GJKKO pushon çështjen e Agron Malajt kundër Xhelal Mziut: Akuzuesi nuk u paraqit në gjykatë

Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka vendosur këtë të enjte, më 15 janar 2026, pushimin e gjykimit të padisë për “Shpifje” të ngritur nga deputeti i PS-së, Agron Malaj kundër deputetit të PD-së, Xhelal Mziu.

Vendimi u mor nga gjyqtarja Irena Gjoka, pasi viktima akuzuese dhe mbrojtja e tij nuk u paraqitën në séance.

Kronologjia e çështjes

Përplasja ligjore mes dy protagonistëve nisi zyrtarisht më 5 qershor 2025, kur Agron Malaj depozitoi kërkesën për gjykim. Ai akuzonte Xhelal Mziun për veprën penale “Shpifja” e kryer botërisht.

Pse u pushua gjykimi?

Sipas njoftimit zyrtar të Gjykatës, procesi u ndërpre jo për shkak të shqyrtimit të fakteve, por për arsye procedurale:

Viktima akuzuese, Agron Malaj, nuk ka qenë i pranishëm në gjykatë. Gjithashtu, as mbrojtësja e tij e zgjedhur, av. M.Gj., nuk është paraqitur në seancën e sotme.

Gjykata konstatoi se mungesa e tyre ishte pa shkaqe të arsyeshme, çka solli pushimin e menjëhershëm të kërkesës.

E drejta për ankim

Ndonëse çështja u pushua në shkallë të parë, ligji i jep mundësi palës paditëse të reagojë. Vendimi parashikon një afat prej 15 ditësh për të bërë ankim në Gjykatën e Posaçme të Apelit për Korrupsionin dhe Krimin e Organizuar, duke nisur nga dita e nesërme e njoftimit të vendimit të arsyetuar.

/rtsh.al/