Gjenden rreth 160 predha nga Lufta e Dytë Botërore në Selenicë

TIRANË, 4 mars /ATSH/ Rreth 160 predha të mbetura nga Lufta e Dytë Botërore janë gjendur pranë urës së Vodicës, në fshatin Vodicë (Selenicë).

Zbulimi u bë nga një firmë që po kryente punime në zonë, e cila njoftoi forcat xheniere për praninë e municioneve të rrezikshme.

Ekspertët e xhenios për dy ditë me radhë zhvilluan operacionin për identifikimin dhe largimin e predhave.

Gjatë ditës së djeshme u gjetën dhe u siguruan rreth 140 predha mortaje, ndërsa gjatë ditës së sotme u evidentuan edhe 20 predha të tjera.

Në total, në zonë janë zbuluar 160 predha të Luftës së Dytë Botërore, të cilat janë transportuar nga specialistët për në Tiranë, ku do të kryhen procedurat për asgjësimin e tyre në mënyrë të kontrolluar.

Ndërhyrja e shpejtë e forcave xheniere shmangu çdo rrezik të mundshëm për banorët dhe për punonjësit që po kryenin punimet në këtë zonë.

/r.e/