Halilaj: Identiteti digjital, në sektorin publik dhe atë privat
TIRANË, 20 tetor /ATSH/ Administratorja e kompanisë shtetërore të prodhimit të dokumenteve biometrike “IdentiTek”, Freskida Halilaj u shpreh sot se projekti i identitetit digjital është i ndërtuar mbi vizionin për transformimin digjital të Shqipërisë.
Gjatë aktivitetit për prezantimin e projektit “Identiteti Digjital” ku të pranishëm ishin edhe Kryeministri Edi Rama dhe ministrja e Punëve të Brendshme, Albana Koçiu, Halilaj tha se që nga dita e parë që është ideuar ky projekt janë ndërmarrë hapa konkretë, nga ndërtimi i një kuadri ligjor, deri te eksperienca ndërkombëtare dhe kalimi i testimeve dhe pilotimeve.
“Ky projekt është shumë i rëndësishëm për ne dhe unë jam shumë e emocionuar që e prezantojmë sot pasi është i ndërtuar mbi vizionin e qartë të Kryeministrit Edi Rama për transformimin digjital të Shqipërisë”, tha Halilaj.
Gjatë demonstrimit të demos funksionale, Halilaj u shpreh se për finalizimin e një identiteti digjital duhet një telefon smart dhe një kartë identiteti fizike.
“Bëhet verifikimi biometrik për çështje sigurie sepse ne duhet të verifikojmë që personi që mban telefonin është i njëjti me atë që mban kartën e ID-së. Një nga elementët më të rëndësishëm të këtij projekti është se identiteti digjital nuk do të kufizohet vetëm në sektorin publik, por edhe në atë privat”, theksoi Halilaj.
Administratorja e IdentiTek tha se një “një 18 vjeçar mund të hapë një llogari bankare në pak sekonda nga komoditeti i shtëpisë, një biznes mund të marrë shërbime publike vetëm me një klikim, ndërsa garantohet mbrojtje shtesë nga rreziqet e botës online për fëmijët”.
“Forca e teknologjisë dhe ndryshimi rezultativ që identiteti digjital sjell do të jetë i prekshëm në jetën tonë të përditshme”, pohoi Halilaj.
/e.i/