Hapen qendrat shëndetësore verore, 24 orë për pushuesit dhe banorët gjatë sezonit turistik

Këtë të hënë zyrtarisht janë hapur qendrat shëndetësore sezonale në Velipojë, Rrjoll dhe Theth, me qëllim ofrimin e shërbimit të shpejtë dhe cilësor për pushuesit dhe komunitetin.

Shefja e Shërbimit Parësor në Shkodër, Megi Bilali, theksoi rëndësinë e këtyre strukturave për përballimin e fluksit të shtuar gjatë verës dhe garantimin e shërbimit mjekësor në zonat turistike. 

“Funksionojnë 24 në shtatë, janë të pajisura me medikamente të nevojshme. Stafi është i angazhuar përgjatë gjithë sezonit për të dhënë një shërbim të shpejtë dhe të sigurt për gjithë pushuesit, por edhe banorët e këtyre zonave.” – u shpreh për RTSH Megi Bilali, Shefe e Shërbimit Parësor. 

Ndërkohë, mjekja Marjana Gjoni ndau eksperiencën e saj të vitit të kaluar në jug të vendit, duke vlerësuar sfidat dhe rëndësinë e gatishmërisë së stafit në sezonin turistik. 

“Si vjet është viti im i parë që jap shërbimin tim mjekësor në Velipojë. E kam kënaqësinë të punoj këtu. Një vit më përpara, në fakt, kam pasur një eksperiencë në plazhet e jugut të Shqipërisë, në qendrën verore të Drimadhes. Sivjet zgjodha veriun. Mendoj që është më shumë ngarkesa, fluksi dhe eksperienca ime profesionale do të jetë më e vlefshme.” 

Funksionimi i këtyre qendrave 24 orë me staf infermieror dhe mjekësor pritet të lehtësojë ndjeshëm aksesin në shërbimin shëndetësor gjatë verës, duke rritur sigurinë dhe mirëqenien e pushuesve në tre nga destinacionet më të frekuentuara turistike të veriut. 

Gazetare: M. Gjoni 

/rtsh.al/