Hegseth: Nuk do mund të më shkarkojnë/ Shefi i Pentagonit mbron luftën me Iranin
schedule12:27 - 6 Nëntor, 2026
Sekretari Amerikan i Luftës Pete Hegseth ka komentuar raportimet e shumta për mundësinë e largimit të tij nga ky post pas humbjes së Republikanëve në zgjedhje, duke mohuar një lajm të tillë dhe duke thënë se Ushtria Amerikane dhe Administrata Republikane do të vijojnë të luftojnë për një Amerikë më të fortë. Hegseth komentoi raportimet për mundësinë e shkarkimit të tij përmes Kongresit dhe një mocioni të nisur nga Demokratët, duke thënë se rivalët politikë e kishin tentuar diçka të tillë edhe me presidentin Trump dy herë në të shkuarën dhe nuk ia kishin dalë, dhe sipas Hegseth, rivalët politikë nuk do t’ia dalin dot as me të.
“Paqja përmes forcës është përsëri politika ushtarake amerikane. Komandanti ynë i përgjithshëm e kërkon këtë dhe ne e zbatojmë. Kjo nuk ka të bëjë me mua, por sigurisht pala tjetër, në rast se e keni vënë re, është e fiksuar. Një kongresmen i pakënaqur dhe i mundur, së bashku me të gjithë aleatët e tij demokratë, ka hedhur gjithashtu hipoteza të rreme për shkarkim nga detyra ndaj meje, ashtu siç u përpoqën dy herë kundër Presidentit Trump. Kjo nuk funksionoi kundër presidentit Trump dhe nuk do të funksionojë as kundër meje, të jeni të sigurt për këtë. Jemi më të vendosur se kurrë, më të vendosur se kurrë për të përfunduar atë që kemi filluar. Do të qëndrojmë, do të luftojmë dhe do ta mbrojmë këtë Republikë nga të gjithë armiqtë, të huaj dhe vendas”, tha Pete Hegseth.
Shtëpia e Bardhë ka mohuar raportimet se Pete Hegseth do të largohet nga posti i Sekretarit të Mbrojtjes pas raportimeve të mediave amerikane se Trump po shqyrtonte një riorganizim të kabinetit të tij pas humbjes në zgjedhje.
Në deklaratën e saj, Shtëpia e Bardhë hodhi po ashtu poshtë raportimet për një dorëheqje të Marko Rubios, ndërsa vetë Sekretari Amerikan i Shtetit sqaroi në një intervistë për New York Times se ai do të vijojë të punojë për Donald Trump deri në fund të mandatit të tij.
Mos rri jashtë: bashkohu me ABC News. Ne jemi kudo!