Hoxha në Bukuresht, diskuton me ministrin rumun forcimin e kapaciteteve për anëtarësimin në BE

Politikë | 20 minuta më parë

Ministri për Evropën dhe Punët e Jashtme, Ferit Hoxha, është takuar në Bukuresht me ministrin rumun të Investimeve dhe Projekteve Evropiane, Alexandru-Mihai Ghigiu, në kuadër të vizitës së tij zyrtare në Rumani.

Sipas njoftimit të Ministrisë për Evropën dhe Punët e Jashtme, në fokus të bisedës ishte procesi i anëtarësimit të Shqipërisë në Bashkimin Evropian dhe nevoja për forcimin e kapaciteteve institucionale e administrative për të përballuar përgjegjësitë që do të sjellë anëtarësimi.

Dy ministrat diskutuan gjithashtu mundësitë për zgjerimin e bashkëpunimit mes autoriteteve vendore të Shqipërisë dhe Rumanisë. Në këtë drejtim, u vlerësua përvoja rumune në përafrimin e qeverisjes vendore me legjislacionin e Bashkimit Evropian.

Një tjetër temë e takimit ishte përdorimi i instrumenteve të politikës së kohezionit për të mbështetur zhvillimin rajonal dhe vendor.

Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.