Irani: Ngushtica e Hormuzit mbetet e mbyllur, 7 kushte për t’u rihapur
Irani ka bërë të ditur se Ngushtica e Hormuzit do të mbetet e mbyllur derisa Shtetet e Bashkuara të pranojnë plotësisht dhe të zbatojnë shtatë kushtet e vendosura nga Teherani.
Në të njëjtën kohë, autoritetet iraniane i kanë dërguar një paralajmërim të ashpër Uashingtonit, duke theksuar se çdo sulm i ri ushtarak do të pasohet nga kundërpërgjigje të fuqishme.
Kreu i Këshillit të Lartë të Sigurisë Kombëtare të Iranit, Mohsen Rezaei, deklaroi se përgjigjja amerikane ndaj kërkesave të vendit të tij nuk është e kënaqshme. Ai këmbënguli se rihapja e kësaj rruge strategjike detare kërkon angazhime konkrete dhe jo thjesht garanci.
Qëndrimi i ri i udhëheqjes iraniane vjen në një kohë kur po zhvillohen përpjekje intensive diplomatike për t’i dhënë fund konfliktit me SHBA-në, ndërsa mbyllja e Ngushticës së Hormuzit vijon të jetë një nga pikat kryesore të përplasjes mes dy vendeve.
Reklamë
Mohsen Rezaei deklaroi se Shtetet e Bashkuara duhet të pranojnë qartësisht të gjitha kërkesat iraniane dhe, mbi të gjitha, t’i zbatojnë ato, përpara çdo ndryshimi të statusit të Ngushticës së Hormuzit.
“Përgjigjja e SHBA-së ndaj të drejtave dhe kërkesave të Iranit nuk ishte bindëse”, u shpreh zyrtari iranian.
“Ata duhet t’u përgjigjen plotësisht dhe shprehimisht shtatë kushteve të Iranit dhe t’i përmbushin ato. Vetëm atëherë Ngushtica e Hormuzit do të rihapet”, theksoi ai.
Sipas informacioneve të bëra publike mbi kushtet e Teheranit, Irani kërkon përfundimin e plotë të armiqësive në Lindjen e Mesme, heqjen e sanksioneve ekonomike, veçanërisht atyre që prekin sektorin e naftës, si dhe lirimin e aseteve iraniane të ngrira jashtë vendit.
Në kërkesat e tjera përfshihen heqja e bllokadës detare amerikane ndaj porteve iraniane, dëmshpërblimet për shkatërrimet e shkaktuara nga lufta, tërheqja e forcave ushtarake amerikane dhe ndalimi i kërcënimeve dhe ndërhyrjeve kundër Iranit.
Për palën iraniane, pranimi i këtyre kushteve përbën një kriter thelbësor për krijimin e kushteve të nevojshme për përparim të vërtetë diplomatik.
Pavarësisht se Teherani deklaron se nuk heq dorë nga mundësia e diplomacisë, Rezaei paralajmëroi se Irani është i gatshëm të kundërpërgjigjet fuqishëm nëse përballet me një tjetër sulm ushtarak.
Sipas zyrtarit iranian, në rast të rifillimit të luftimeve, forcat e armatosura të vendit mund të përdorin sisteme të reja armatimi dhe kapacitete ushtarake që nuk janë vënë ende në përdorim.
Teherani kërcënon se një zhvillim i tillë do të pasohet nga “goditje shkatërruese” ndaj kundërshtarëve të tij.
Këto paralajmërime shtojnë pasigurinë në rajon, ndërsa udhëheqja iraniane po përpiqet të ndërthurë presionin në negociata me ruajtjen e fuqisë së saj ushtarake parandaluese.
Në deklaratat e mëparshme, Rezaei ka theksuar se vendi i tij nuk dëshiron zgjatjen e luftës, por nuk do të rikthehet në marrëveshje që mbështeten vetëm te vullneti i mirë politik i palës tjetër.