Iu gjetën arsenal armësh dhe municione luftarake me silenciatorë, dërgohet për gjykim një person

Prokuroria e Fierit ka dërguar për gjykim shtetasin me inicialet M.R., i akuzuar për veprën penale “Mbajtja pa leje dhe prodhimi i armëve, armëve shpërthyese dhe i municionit”.

M.R. është ndaluar teksa drejtonte automjetin, ku iu gjet një armë zjarri tip pistoletë dhe 50 fishekë. Kontrollet e mëtejshme në ambiente të përdorura prej tij zbuluan një arsenal armësh. Gjatë operacionit u sekuestruan 12 armë të tjera zjarri, mes të cilave 10 automatikë model 56, një armë automatike tip “Skorpion” dhe një pistoletë.

Ekspertiza tekniko-balistike ka konfirmuar se armët ishin në gjendje funksionale dhe të afta për qitje. Gjithashtu, u sekuestruan 465 fishekë luftarakë të kalibrave të ndryshëm, 14 krehra për armë automatike, pushkë dhe pistoleta, si dhe dy pajisje për zbutjen e zhurmës së armëve, të njohura si silenciatorë.

Nga hetimet janë evidentuar edhe të dhëna që ngrenë dyshime se një pjesë e armëve mund të mbahej me qëllim shitjen e paligjshme. Për këtë pjesë të dyshimeve, hetimet vijojnë në një procedim penal të ndarë.

/rtsh.al/