Java e 5-të e “Abissnet Superiore”, spikasin sfidat Tirana – Dinamo City dhe AF Elbasani – Teuta

TIRANË, 26 shtator /ATSH/ Java e pestë e kampionatit “Abissnet Superiore” do të luhet e gjitha në fundjavë. Tri nga ndeshjet do të luhen ditën e shtunë, ndërsa dy sfidat e mbetura do të zhvillohen të dielën.

Bylis-Partizani dhe Tirana-Dinamo City do të luhen të shtunën në orën 16:00. Ballshiotët do të presin në shtëpi të kuqtë e kryeqytetit, ndërsa përballja mes bardhebluve dhe Dinamo City-t do të luhet në stadiumin “Selman Stërmasi”.

Të dyja skuadrat nuk “kanë shijuar” ende tri pikët e para për këtë sezon dhe kjo ndeshje pritet të jetë mjaft e luftuar.

Po në këtë ditë do të luhen edhe një tjetër sfidë mjaft interesante, ajo mes AF Elbasani – Teuta.

Verdheblutë po bëjnë mjaft mirë këtë fillim sezoni, duke marrë tri fitore dhe një barazim në katër ndeshje të luajtura dhe kryesuar kështu kampionatin në katër javët e para. Ndërsa durrsakët kanë arritur tre barazime dhe një fitore. AF Elbasani – Teuta do të luhet në “Elbasan Arena” në ora 19:00.

Të dielën do të zhvillohen dy sfidat e tjera të javës. Pas barazimit me Teutën, Vllaznia do të presë në shtëpi Vorën ndërsa Flamurtari do të përballet me Egnatian në stadiumin “Flamurtari”. Të dyja sfidat janë programuar të nisin në 19:00.

Kujtojmë që Java e katërt e “Abissnet Superiore” dha këto rezultate:

Vora – Flamurtari 1-0

Dinamo City – Bylis 0-0

Partizani – AF Elbasani 0-1

Egnatia – Tirana 2-0

Teuta – Vllaznia 1-1

JAVA E PESTË

Bylis – Partizani, 27.09.2025 16:00

Tirana – Dinamo City, 27.09.2025 16:00

AF Elbasani – Teuta, 27.09.2025 19:00

Vllaznia – Vora, 28.09.2025 19:00

Flamurtari – Egnatia, 28.09.2025 19:00