KIEV – Mbi 600 dronë ukrainas drejt Moskës

MOSKË, 16 gusht /ATSH/ – Mbi 600 dronë ukrainas kanë fluturuar gjatë natës mbi rajonin e Moskës, ndërsa më shumë se 200 prej tyre janë shkatërruar, sipas kryebashkiakut të kryeqytetit rus, Sergei Sobyanin.

Sobyanin deklaroi se shërbimet e emergjencës janë angazhuar në zonat ku kanë rënë mbetje të dronëve. Të paktën tre persona kanë mbetur të plagosur, ndërsa autoritetet vijojnë vlerësimin e dëmeve.

Sulmet ukrainase ndaj objektivave në thellësi të territorit rus janë intensifikuar muajt e fundit, duke synuar kryesisht instalacione ushtarake, industriale dhe logjistike. Kievi i konsideron këto sulme një përgjigje ndaj bombardimeve të vazhdueshme ruse ndaj qyteteve dhe infrastrukturës ukrainase.

Ndërkohë, autoritetet ukrainase raportuan viktima dhe të plagosur pas sulmeve ruse gjatë natës. Në qytetin e Kryvyi Rih, në rajonin e Dnipropetrovskut, një grua u vra dhe gjashtë persona të tjerë u plagosën nga një sulm i kombinuar me raketa balistike dhe dronë.

Sipas autoriteteve lokale, forcat ruse goditën gjithashtu dy objekte industriale në qytet.

Në Kiev, alarmi ajror u dha pak para orës 02:00, për shkak të kërcënimit nga raketat balistike. Kryebashkiaku Vitali Klitschko u bëri thirrje banorëve të qëndronin në strehimore, ndërsa u raportuan shpërthime dhe zjarre në zona jorezidenciale të kryeqytetit.

Një person u plagos në Kiev, ndërsa dëme u raportuan në zonat Obolonsky dhe Holosiivskyi.

Sulme u raportuan gjithashtu në Kremenchuk, në rajonin e Poltavës, ndërsa autoritetet lokale nuk kanë dhënë ende detaje të plota mbi dëmet apo viktimat.

Rusia dhe Ukraina kanë intensifikuar përdorimin e dronëve dhe raketave me rreze të gjatë, duke zgjeruar sulmet përtej vijës së frontit, ndërsa lufta vijon që prej pushtimit të plotë rus të Ukrainës në shkurt 2022./  a.jor.