KINEMA – Vdes aktorja e njohur Diane Keaton

LOS ANXHELES, 11 tetor /ATSH/ – Veterania e Hollivudit, aktorja e njohur Diane Keaton, ka vdekur në moshën 79-vjeçare, sipas revistës ”People”.

Një zëdhënës i familjes tha se nuk do të bëhen të disponueshme detaje të tjera menjëherë dhe se familja e saj kishte kërkuar privatësi.

Aktori Ben Stiller shkroi në X “Diane Keaton. Një nga aktoret më të mëdha të filmit. Një ikonë e stilit, e humorit dhe e komedisë. E shkëlqyer. Çfarë personi!”.

Aktorja legjendare ishte e njohur për bashkëpunimet e saj me Woody Allen dhe fitoi çmimin Oscar për aktoren më të mirë për “Annie Hall” (1977), i cili u drejtua nga Woody Allen.

Të dy gjithashtu vazhduan të punonin së bashku gjatë viteve në filmat “Manhattan” (1979), “Radio Days” (1987) dhe “Hollywood Mavericks” (1990).

Përveç “Annie Hall”, Keaton ishte e nominuar për Oscar për aktoren më të mirë për “Reds”, “Something’s Gotta Give” dhe “Marvin’s Room”.

Ajo njihet gjithashtu për punën e saj në filma si “The First Wives Club”, “Father of The Bride”, “The Family Stone” dhe filmat “Book Club”.

Debutimi i saj në film ishte në filmin “Lovers and Other Strangers” të viteve 1970, por suksesi i saj i madh erdhi në filmin “The Godfather” të Francis Ford Coppola, si e dashura e Michael Corleone të Al Pacino-s, në vitin 1972./ a.jor.