KOMENT - Republikanët e Trump humbasin kontrollin e Dhomës së Përfaqësuesve dhe Senatit amerikan - ATSH -
Demokratët pritet të sigurojnë shumicën në Senatin me 100 anëtarë, përfshirë dy senatorë të pavarur që janë në aleancë me këtë parti, sipas transmetuesve amerikanë NBC News dhe ABC.
Rezultati shënon një goditje të rëndësishme për Trump, i cili i kishte kthyer zgjedhjet e mesit të mandatit në një referendum për politikat e tij. Me demokratët që pritet të kontrollojnë të dyja dhomat e Kongresit, aftësia e tij për të çuar përpara agjendën politike do të dobësohet ndjeshëm.
Menjëherë pasi transmetuesit parashikuan se republikanët kishin humbur Dhomën e Përfaqësuesve, Trump reagoi në platformën e tij të rrjeteve sociale, Truth Social.
“Unë nuk isha në fletën e votimit dhe, nëse do të isha, do të kishim fituar me një rezultat dërrmues! Faleminderit për vëmendjen tuaj për këtë çështje”, shkroi ai.
Trump deklaroi gjithashtu se ishte i gatshëm të pranonte rezultatet e zgjedhjeve dhe të bashkëpunonte me demokratët.
“Ne do të punojmë me demokratët dhe, e dini, mezi presim të bashkëpunojmë me ta. Ndoshta do të arrijmë diçka”, tha ai për gazetën “New York Times”.
Më vonë, ai publikoi një fotografi të një kapeleje të kuqe me fjalën “VETO” të shtypur mbi të dhe kritikoi ashpër transmetuesin Fox News.
Kryetari i Dhomës së Përfaqësuesve, Mike Johnson, tha se ishte “i zhgënjyer” nga rezultatet.
“U përballëm me disa pengesa të vërteta”, u tha Johnson mbështetësve të tij.
“Në vitin 2028, do ta rimarrim Dhomën e Përfaqësuesve dhe do ta përfundojmë këtë punë”, deklaroi ai.
Fitorja e demokratëve i hap rrugën Hakeem Jeffries për t’u bërë kryetari i parë me ngjyrë i Dhomës së Përfaqësuesve në historinë e SHBA-së, raportoi CNN.
Demokratët siguruan fitore të rëndësishme që në orët e para
Demokratët siguruan disa fitore të rëndësishme që në orët e para, përfshirë garën në Teksas.
Kandidati i tyre, James Talarico, mposhti republikanin Ken Paxton, sipas projeksioneve të NBC News dhe CBS News. Kjo është hera e parë në afro 40 vjet që demokratët fitojnë këtë vend.
Ata fituan gjithashtu një vend në Senatin amerikan në shtetin e Kansasit për herë të parë në 94 vjet, pasi Adam Hamilton mposhti senatorin republikan në detyrë, Roger Marshall, raportuan NBC News dhe ABC.
Kansas, një shtet kryesisht bujqësor në rajonin e Mesperëndimit, ka qenë prej kohësh një bastion i republikanëve. Fakti që Marshall u përball me një sfidë serioze ishte konsideruar tashmë një surprizë.
Hera e fundit që një demokrat u zgjodh në Senatin amerikan nga Kansasi ishte në vitin 1932.
Demokratët fituan gjithashtu vende në Senat që më parë mbaheshin nga republikanët në Karolinën e Veriut, Karolinën e Jugut, Ohajo dhe Ajova.
Në Karolinën e Jugut, kandidatja republikane Darline Graham Nordone humbi përballë demokrates Annie Andrews.
Andrews, një pediatre, do të jetë senatorja e parë demokrate e Karolinës së Jugut në më shumë se 20 vjet.
Duke iu drejtuar mbështetësve të partisë, Andrews tha se shteti kishte bërë histori.
“Ky vend në Senat nuk i përket një familjeje, një partie apo Uashingtonit. Ai ju përket juve dhe do t’ju përkasë gjithmonë”, deklaroi ajo.
Graham Nordone është motra e senatorit Lindsey Graham, i cili ndërroi jetë në korrik.
Kandidatura e saj ishte e veçantë pjesërisht për shkak se ajo nuk kishte pasur më parë një profil politik, përpara vdekjes së vëllait të saj.
62-vjeçarja e ndërtoi pjesën më të madhe të fushatës së saj mbi mbështetjen e Trump dhe trashëgiminë politike të vëllait të saj, të cilën u zotua se do ta vazhdonte./ a.jor.