Kim Jong-un provokon sërish rajonin, Koreja e Veriut zbulon sistemin e ri hipersonik

Koreja e Veriut tha të enjten se testet e saj të fundit të raketave përfshinin një sistem të ri hipersonik që synonte forcimin e parandalimit të luftës bërthamore, ndërsa udhëheqësi Kim Jong-un vazhdon të ndërtojë armë të dizajnuara për të mbingarkuar mbrojtjen e Koresë së Jugut.

Raporti nga Agjencia Qendrore Koreane e Lajmeve e Koresë së Veriut (KCNA) erdhi një ditë pasi ushtria e Koresë së Jugut tha se zbuloi se Pheniani po lëshonte disa raketa nga një zonë në jug të kryeqytetit, dhe tha se ato fluturuan rreth 350 kilometra në verilindje përpara se të binin në tokë.

KCNA tha se lëshimet përfshinin dy predha hipersonike që goditën me saktësi një objektiv tokësor në rajonin verior të vendit.

Agjencia e përshkroi sistemin si strategjik, duke nënkuptuar se raketat ishin projektuar të pajiseshin me koka bërthamore.

KCNA nuk e specifikoi emrin e sistemit të raketave që testoi. Në një paradë ushtarake në fillim të këtij muaji, Kim zbuloi disa nga armët më të reja të ushtrisë së tij, duke përfshirë atë që dukej të ishte një sistem balistik me rreze të shkurtër veprimi i pajisur me mjete hipersonike rrëshqitëse.

Testet ndodhën disa ditë përpara se udhëheqësit botërorë, përfshirë Presidentin e SHBA-së Donald Trump dhe Presidentin kinez Xi Jinping, të mblidhen në Korenë e Jugut për takimet vjetore të Bashkëpunimit Ekonomik Azi-Paqësor.

Forcat Amerikane në Kore thanë në një deklaratë se ishin “plotësisht të vetëdijshme” për lëshimet balistike të Koresë së Veriut dhe gjithashtu për “ndjekjen e saj të pamëshirshme të aftësive të raketave me rreze të gjatë veprimi”.

Ajo i kërkoi Phenianit të përmbahet nga “veprimet e paligjshme dhe destabilizuese” në shkelje të sanksioneve të Këshillit të Sigurimit të OKB-së, duke shtuar se angazhimi i SHBA-së ndaj aleancës së saj me Seulin mbetet “i patundur”.

Koreja e Veriut vitet e fundit ka testuar sisteme të ndryshme raketash të pajisura me armë hipersonike, të cilat janë projektuar të fluturojnë me më shumë se pesë herë shpejtësinë e zërit.

Shpejtësia dhe manovrueshmëria e armëve të tilla kanë për qëllim t’i ndihmojnë ato të shmangin sistemet rajonale të mbrojtjes nga raketat, por ekspertët kanë vënë në pikëpyetje nëse ato kanë fluturuar vazhdimisht me shpejtësitë që Veriu pretendoi gjatë testeve.